L'iniziativa da giustia en furma concisa

 

Las derschadras federalas ed ils derschaders federals duain pudair decider independentamain da conflicts d'interess e d'influenzas politicas. Quai n'è oz betg pussaivel.

Per vegnir elegida sco derschadra federala u derschader federal sto ina persuna de facto far part oz d'ina partida politica ed avair bunas relaziuns cun purtaders da decisiuns politics.

Quest entretschament da relaziuns exista era suenter l'elecziun en il Tribunal federal e po influenzar las decisiuns da las derschadras e dals derschaders. Ultra da quai èsi pussaivel da metter las derschadras ed ils derschaders sut pressiun cun smanatschar da betg reeleger els pli. 

Perquai duain giuristas e giurists avair la pussaivladad da daventar derschadras federalas e derschaders federals unicamain sin fundament da lur qualificaziuns – era senza ina rait da relaziuns en la politica e l'administraziun. E suenter na duain els betg stuair temair dischavantatgs en cas da decisiuns malempernaivlas u temair da betg vegnir reelegids.
Questas finamiras cuntansch'ins cun l'iniziativa federala dal pievel «Nominar las derschadras federalas ed ils derschaders federals cun la procedura da trair la sort». 

Las candidatas ed ils candidats per l'uffizi da derschader pon participar a la procedura da trair la sort unicamain sin fundament da lur qualificaziun professiunala e persunala. La procedura da trair la sort garantescha in'occupaziun gista dal Tribunal federal senza resguardar eventuals cudeschs da partida. Las derschadras federalas ed ils derschaders federals nominads cun la procedura da trair la sort restan en uffizi fin a lur pensiun.

Pagina iniziala