Lantschà l'iniziativa da giustia

A Berna è vegnida lantschada l'iniziativa federala dal pievel «Nominar las derschadras federalas ed ils derschaders federals cun la procedura da trair la sort». Las derschadras federalas ed ils derschaders federals na duain betg pli vegnir elegids sin fundament da lur cudesch da partida, mabain sulettamain a basa da lur qualificaziuns professiunalas e persunalas.

L'intent da l'iniziativa è da realisar la separaziun da las pussanzas consequentamain en la pratica.  
Oz stat davos las elecziuns da las derschadras e dals derschaders in vast entretschament da relaziuns en la politica. L'iniziativa vul procurar che giuristas e giurists independents possian daventar derschadras federalas e derschaders federals e betg mo quels che vegnan nominads da las partidas represchentadas en l'Assamblea federala. Pertge che oz n'han candidaturas da persunas senza ina colliaziun en la politica praticamain nagina schanza.
Las giuristas ed ils giurists duain pudair daventar derschadras federalas e derschaders federals sulettamain sin fundament da lur qualificaziuns era senza ina rait da relaziuns politicas. E sco tals na duain els stuair temair naginas consequenzas negativas, era sch'els prendan decisiuns malempernaivlas.
Cun nominar las derschadras federalas ed ils derschaders federals cun la procedura da trair la sort èsi pussaivel da cuntanscher questas finamiras. La procedura da trair la sort è pli democratica che las elecziuns, perquai ch'ella garantescha l'egualitad da las schanzas da mintga persuna qualifitgada.
La procedura da trair la sort – ina cumissiun d'experts controllescha che las candidatas ed ils candidats disponian da las qualificaziuns professiunalas necessarias – garantescha ch'il Tribunal federal restia independent da la legislativa e da l'executiva sco era da las forzas politicas respectivas.
La separaziun da las pussanzas è in fundament da la democrazia federala e l'iniziativa da giustia rinforza quest fundament e la fidanza en la giustia.
Per rinforzar supplementarmain l'independenza e la fidanza pretenda l'iniziativa che las derschadras federalas ed ils derschaders federals possian star en uffizi fin a la pensiun. Quai impedescha ch'il parlament po far squitsch politic sin la giustia cun smanatschar da betg reeleger ina derschadra u in derschader.

Text da l'iniziativa

Pagina iniziala