Citats
La fidanza en la giustia premetta sia independenza
"L'elecziun [da las derschadras federalas e dals derschaders federals] na duess betg pli vegnir determinada da l'aritmetica da las partidas. Actualmain partan las partidas ils sezs dal Tribunal federal sco ina petta. (…) La giustia funcziuna numnadamain mo bain, sch'il pievel respecta las derschadras ed ils derschaders – e las derschadras ed ils derschaders meritan quest respect mo sch'els fan ina parita independenta e neutrala. Il sistem actual che sa basa sin l'appartegnientscha a partidas turbla supplementarmain quest maletg, perquai che las derschadras ed ils derschaders èn suttamess ad ina reelecziun periodica."
Claude Rouiller, anteriur derschader federal, en: Denis Masmejan, «Les partis se partagent les sièges du Tribunal fédéral comme si c’était un gâteau». Le Temps, 12 da settember 2014
Candidaturas independentas da partidas n'han praticamain nagina schanza
"Ins parta dal fatg ch'il sistem da la represchentaziun proporziunala da las partidas reflecteschia las forzas socialas e politicas da la societad en la cumposiziun dal tribunal e che vegnia uschia pussibilitada ina furmaziun da l'opiniun pluralistica. Quai constat però mo parzialmain, pertge che las partidas expriman mo per part las tendenzas da la societad. La populaziun s'identifitgescha adina pli pauc cun partidas. In problem gravant è er il fatg che candidaturas independentas da partidas n'han praticamain nagina schanza."
Niccolò Raselli, anteriur derschader federal, en: Zoe Gwerder, Problem mit der Unabhängigkeit. Luzerner Zeitung, 9 da matg 2018, p.33
Exclusiun da las independentas e dals independents
"Sin plaun federal cumondan las partidas politicas sulettas, pertge che las elecziuns en il Tribunal penal federal ed en il Tribunal administrativ federal sco era la nominaziun dal tribunal suprem a Losanna èn exclusivamain chaussa da l'Assamblea federala. … En la realitad politica vegnan … candidaturas fitg qualifitgadas senza succurs da la politica da partida zavradas anticipadamain. Dapi l'onn 1942 n'è nagina persuna independenta vegnida elegida en il Tribunal federal. Grazia al grond sustegn entaifer la partida survegnan adina puspè in uffizi derschadras e derschaders cun qualificaziuns che vegnan baud u tard messas en dubi."
Markus Felber, Problematische Kür der Richter in der Schweiz, NZZ 31-12-2009
Megliers resultats grazia a la procedura da trair la sort
"En las constituziuns da las democrazias occidentalas han ins sutstimà la rolla da las partidas e manchentà da la preschentar a moda suffizienta. Plinavant n'han ins betg limità suffizientamain la pussanza e l'influenza da las partidas. Jau sun persvas ch'ins survegniss megliers resultats politics cun agid d'ina procedura da trair la sort intelligenta che cun favurisar il svilup da milieus politics pervia d'in maletg da partidas consolidà."
Peter Sloterdijk en il discurs dal di cun Ivana Pribakovic: Peter Sloterdijk und die Demokratie, Radio SRF 1, Rendez-Vous am Mittag, 19-4-2018
L'equiliber da las pussanzas dal stadi è manglus
"Il tribunal e la derschadra u il derschader vegnan fatgs dependents da diversas relaziuns, en spezial cun l'Assamblea federala. Quellas relativeschan l'independenza dal tribunal suprem. Tranter auter sa mussi qua ch'il model ideal d'equiliber da las pussanzas dal stadi en Svizra è vegnì recepì a moda manglusa ed en mintga cas sutordinada a l'idea da la suveranitad dal pievel."
Regina Kiener, Richterliche Unabhängigkeit. Verfassungsrechtliche Anforderungen an Richter und Gerichte. Berna 2001, p. 29
Vulais Vus exprimer Vossa opiniun sco experta/expert sin questa pagina?